Mae Grant Dysgu Addysg Bellach Llywodraeth Cymru (GDLlC AB) yn darparu cymorth ariannol i bobl 19 oed neu hŷn.

Fe'i bwriedir ar gyfer myfyrwyr sydd am barhau â'u haddysg mewn ysgol neu goleg addysg bellach.

Mae'n grant prawf modd, a delir mewn rhandaliadau, yn seiliedig ar nifer y tymhorau yng nghwrs neu raglen astudio'r myfyriwr.

Mae cynllun GDLlC AB yn gymhelliant i fyfyrwyr o gartrefi incwm is aros mewn addysg bellach neu ddychwelyd i addysg bellach. Ei fwriad yw:

• annog myfyrwyr i ennill cymwysterau
• helpu cynyddu eu cyfleoedd cyflogaeth

Mae'r nodiadau canllaw hyn yn dilyn camau'r cynllun GDLlC AB, o'r cais i'r taliad. Byddant yn rhoi syniad clir i Ganolfannau Dysgu cydnabyddedig o sut mae'r cynllun yn gweithio a sut mae eich rôl bwysig yn cyd-fynd â'r prosesau cyffredinol.

Dylech ddarllen y nodiadau hyn ar y cyd â chanllaw defnyddwyr Porth y Ganolfan Ddysgu.

Mae Canolfannau Dysgu yn chwarae rhan hanfodol yn y gwaith o hyrwyddo cynllun GDLlC AB a'r camau cais cychwynnol. Gofynnwn felly i chi hybu ymwybyddiaeth o'r cymorth ariannol sydd ar gael trwy’r cynllun.

Mae pecyn cais GDLlC AB dwyieithog yn cynnwys gwybodaeth bwysig a nodiadau canllaw i fyfyrwyr. Fodd bynnag, gofynnwn i chi hefyd gynnig anogaeth a chyngor ynghylch llenwi a dychwelyd y ffurflen. Gallai hyn fod yn berthnasol i rieni neu warcheidwaid hefyd.

Dywedwch wrth eich myfyrwyr bod Cyllid Myfyrwyr Cymru yn darparu gwasanaeth dwyieithog. Mae'r ffurflen gais GDLlC AB a ffurflenni arweiniad eraill i fyfyrwyr a rhieni hefyd ar gael yn Gymraeg. Gallant lawrlwytho'r rhain ar wefan Cyllid Myfyrwyr Cymru.

Er mwyn bod yn gymwys ar gyfer GDLlC AB rhaid i fyfyriwr:

• fod yn preswylio (yn byw fel arfer) yng Nghymru
  
  
• fod yn 19 oed neu hŷn ar neu cyn diwrnod cyntaf y flwyddyn academaidd (1 Medi)
  
  
• fodloni'r gofynion cenedligrwydd a phreswylio
  
  
• fyw mewn aelwyd sydd ag incwm blynyddol o £18,370 neu lai
  
  
• wedi gwneud cais o fewn 9 mis o ddechrau eu cwrs, ac wedi ei gwblhau o fewn 12 mis i ddechrau

Ni ddylai fod yn derbyn cyllid ar gyfer y cwrs neu’r rhaglen astudio o ryw ffynhonnell arall, er enghraifft:

• Rhaglen Waith
  
  
• Lwfans Hyfforddi
  
  
• Lwfansau Cynhaliaeth Addysg (LCA)
  
  
• Dysgu Seiliedig ar Waith (DSW)

Gall rhai myfyrwyr o Gymru fod yn mynychu canolfannau dysgu yn Lloegr. Gall canolfannau dysgu Saesneg gynnig cyllid Benthyciad Dysgwr Uwch i dalu ffioedd y cwrs. Mewn sefyllfaoedd fel hyn, efallai y bydd Benthyciad Dysgwr Uwch a chyllid GDLlC AB ar gael i’r myfyriwr.

Byddwn yn asesu incwm y cartref yn wahanol ar gyfer myfyrwyr sy'n gadael gofal. Er mwyn i fyfyriwr cymwys gymhwyso fel rhywun sy’n gadael gofal, rhaid iddo fod o dan 25 oed ar ddechrau ei gwrs. 

Gellir ystyried myfyrwyr yn ymadawyr gofal os ar unrhyw adeg o 14 oed i ddiwrnod cyntaf blwyddyn academaidd gyntaf eu cwrs:

• nad ydynt wedi bod dan ofal cyfreithiol eu rheini am gyfanswm o 13 wythnos neu fwy
  
  
• roeddynt dan orchymyn gwarchodaeth arbennig, neu yng nghystodaeth neu ofal cyfreithiol awdurdod lleol
  
  
• maent wedi cael llety gan yr awdurdod lleol am 13 wythnos neu fwy

Gallai ymgeiswyr a ddychwelwyd i ofal cyfreithiol eu rhieni rhwng 14 ac 16 oed gael eu hystyried yn rhai sy'n gadael gofal o hyd.

I dderbyn GDLlC AB, rhaid i fyfyrwyr fod yn astudio cwrs dynodedig. Rhaid i'r cwrs gael ei ddarparu gan neu mewn ysgol neu goleg cydnabyddedig.

Yr ysgol neu’r coleg sy’n gyfrifol am gadarnhau bod cwrs y myfyriwr yn ddilys ar gyfer cyllid GDLlC AB. Gallwch wneud hyn trwy Borth y Ganolfan Ddysgu, fel rhan o’r broses i gadarnhau Cytundeb Dysgu GDLlC AB y myfyriwr.

Oriau cyswllt

Rhaid i bob myfyriwr ddilyn neu fwriadu dilyn cwrs dynodedig sydd ag o leiaf 275 o oriau cyswllt. At ddibenion GDLlC, rhaid i gyrsiau dynodedig AB cymwys fod â:

• 500 neu fwy o oriau cyswllt os ydynt yn llawn amser
• 275 i 499 o oriau cyswllt os ydynt yn rhan amser

Mae cynllun GDLlC AB yn gadael rhywfaint o le i ddehongli oriau cyswllt. Dyma’r amser pan fydd myfyriwr cymwys yn cael ei addysgu neu ei oruchwylio yn ystod cyfnodau astudio neu ymarfer.

Yn gyffredinol, dylai hyn gynnwys unrhyw amser pan fo aelod o staff y Ganolfan Ddysgu yn bresennol i roi arweiniad penodol tuag at y gweithgaredd dysgu. Gall hefyd fod yn aelod o staff sefydliad sydd wedi'i is-gontractio.

Gall oriau cyswllt gynnwys darlithoedd, tiwtorialau ac astudio dan oruchwyliaeth yn y gweithle. Gallant hefyd gynnwys amser cyswllt gyda staff sy'n asesu cyflawniadau'r myfyriwr, er enghraifft, asesu cymhwysedd.

Mae’n rhaid i chi sicrhau bod nifer yr oriau cyswllt sydd gan y cwrs yn bodloni’r gofynion ar gyfer cymorth GDLlC AB. Rhaid i chi hefyd sicrhau y gallwch gofnodi presenoldeb at ddibenion gweinyddu ac archwilio.

Math o gwrs

Mae meini prawf cwrs cymwys wedi'u nodi yng nghynllun GDLlC AB. Rhaid i gwrs dynodedig cymwys:

• gael ei ariannu’n gyhoeddus
• ofyn am bresenoldeb gyda darparwr addysg cydnabyddedig

Rhaid i gyrsiau fod yn gymwysterau cydnabyddedig hyd at a chan gynnwys Cymwysterau Cenedlaethol lefel 3.

Gofyniad pwysig yw bod yn rhaid i'r cwrs ddangos rhywfaint o gynnydd ar gyfer y myfyriwr o'r dechrau i'r diwedd. Cynhwysir cyrsiau academaidd a galwedigaethol.

Dim ond cyrsiau addysg bellach sy'n ddilys ar gyfer GDLlC AB. Nid yw cyrsiau addysg uwch (lefel 4 ac uwch) yn gymwys.

Mathau o gyrsiau cymwys

Lefel Mynediad:

• paratoi ar gyfer cymwysterau lefel 1
• Ymgysylltiad Hyfforddeiaeth

Lefel sylfaen 1:

• BTEC lefel 1
• NVQ lefel 1
• Hyfforddeiaeth lefel 1
• City & Guilds lefel 1
• VRQ lefel 1

Lefel ganolradd 2:

• BTEC lefel 2
• NVQ lefel 2
• TGAU
• City & Guilds lefel 2
• VRQ lefel 2

Lefel uwch 3:

• Safon Uwch
• Mynediad at Addysg Uwch
• BTEC lefel 3
• NVQ lefel 3
• VRQ lefel 2

Gallwch ddod o hyd i ragor o wybodaeth am gymwysterau a sut i brosesu'r rhain yng nghanllaw defnyddwyr Porth y Ganolfan Ddysgu.

Os nad ydych yn siŵr a yw cwrs yn ddilys ai peidio, dylech anfon e-bost at Lywodraeth Cymru yn isadrancyllidmyfyrwyr@llyw.cymru.

Cyrsiau cymwys – rhaglenni Sgiliau Byw'n Annibynnol

Ar gyfer y cynllun GDLlC (AB), rhaid i fyfyrwyr cymwys fod yn cyflawni cwrs addysg bellach hyd at lefel 3. Mae hyn gyfwerth â Safon Uwch neu NVQ lefel 3, sy'n arwain at gymhwyster a gyhoeddir gorff dyfarnu cydnabyddedig.

O flwyddyn academaidd 2019/20, estynnodd Llywodraeth Cymru gymorth i fyfyrwyr ag anawsterau dysgu ac anableddau ar raglenni Sgiliau Byw’n Annibynnol (ILS) sy’n cynnwys darpariaeth heb ei hachredu.

Mae pob Canolfan Ddysgu sy'n cynnig rhaglenni ILS yn gyfrifol am bennu addasrwydd y myfyrwyr.

Mae rhaglenni ILS yn dilyn amserlen gadarn o brosesau ar gyfer:

• asesiadau cychwynnol myfyrwyr
• gosod targedau
• monitro cyflawniad yn erbyn targed

Mae’r prosesau hyn a osodwyd gan Lywodraeth Cymru yn cyd-fynd â chytundebau GDLlC AB cyfredol.

Datblygwyd y cwricwlwm diwygiedig mewn ymateb i argymhellion a nodwyd yn Adroddiad Thematig diweddar Estyn. Mae pob rhaglen newydd wedi'i chynllunio i ddarparu dull ymarferol o ennill a chyfnerthu sgiliau, i baratoi myfyrwyr ar gyfer bywyd fel oedolion.

O dan y cwricwlwm newydd, mae myfyrwyr ILS yn dilyn rhaglenni unigol wedi’u teilwra sy’n datblygu eu sgiliau ar draws 4 piler dysgu:

• iechyd a lles
• cyflogadwyedd
• byw’n annibynnol
• cynhwysiant cymunedol

I gefnogi’r datblygiad newydd hwn, mae myfyrwyr ag anawsterau dysgu sy’n cychwyn ar raglen ILS yn gymwys i gael cymorth GDLlC AB o flwyddyn academaidd 2019/20. Mae hyn yn amodol ar fodloni'r holl feini prawf cymhwysedd eraill. Mae'r rhain yn cynnwys cymhwyster personol, trothwyon incwm a gofynion preswylio.

Mae'r rhaglen heb ei hachredu. Mae'n arwain at gyflawni rhaglen ddysgu bersonol a ariennir gan Lywodraeth Cymru o dan Paratoi ar gyfer Bywyd a Gwaith.

Astudiaeth gysylltiedig â gwaith

Nid yw myfyrwyr sy'n mynychu ysgol neu goleg fel rhan o brentisiaeth neu astudiaeth gysylltiedig â gwaith yn gymwys i gael GDLlC AB.

Os yw lleoliad gwaith gorfodol yn rhan o gwrs y myfyriwr, bydd hyn yn cyfrif tuag at yr oriau cyswllt cyffredinol ar gyfer GDLlC AB.

Os yw lleoliadau yn elfen orfodol o gwrs, mae’n bwysig nad oes cyllid dwbl. Gallai hyn ddigwydd os yw myfyrwyr yn cael lwfans dysgu seiliedig ar waith (DSW).

Dysgu o Bell

Nid oes gan reolau cynllun GDLlC ddarpariaethau ar gyfer dysgu o bell. Gallwn ddyfarnu taliadau dewisol i fyfyrwyr na allant fynychu sesiynau dysgu personol mewn canolfan ddysgu oherwydd anabledd. Rhaid nodi hyn yn eu cytundeb dysgu.

Prif egwyddor cynllun GDLlC AB yw cefnogi dilyniant myfyrwyr cymwys o flwyddyn astudio flaenorol.

I ddangos dilyniant o flwyddyn flaenorol, rhaid i fyfyrwyr fod wedi cofrestru ar flwyddyn ganlynol eu cwrs. Fel arall, efallai y byddant wedi cofrestru ar gwrs ar lefel astudio uwch o'r adeg yr oeddent yn gymwys ddiwethaf ar gyfer GDLlC AB.

Ni fydd myfyrwyr yn gymwys ar gyfer GDLlC AB os ydynt wedi derbyn cymorth GDLlC AB yn flaenorol i fynychu cwrs ar yr un lefel neu lefel uwch. Rhaid iddynt fel arfer ddangos cynnydd i lefel uwch o ddysgu er mwyn parhau i fod yn gymwys.

Mewn achosion eithriadol, gellir ystyried cymhwysedd GDLlC AB ar gyfer ail gyfnod astudio. Mae hyn fel arfer pan na allai'r myfyriwr basio'r flwyddyn academaidd oherwydd amgylchiadau esgusodol. Dylech ofyn i'n Desg Gymorth Partneriaid adolygu'r achosion hyn.

Ym mhob achos, rhaid i'r myfyriwr roi tystiolaeth ddogfennol o bob ffynhonnell briodol pan fyddwch yn gofyn am hyn. Efallai bod rhai myfyrwyr wedi gwneud cynnydd sylweddol ond efallai nad ydynt wedi symud ymlaen mewn termau academaidd yn unig, er enghraifft o lefel 1 i lefel 2. Gallai hyn gynnwys myfyrwyr ag anghenion dysgu ychwanegol neu anableddau.

Eithriad arall yw os yw myfyriwr yn astudio ar yr un lefel â'r flwyddyn flaenorol, ond mewn maes astudio cysylltiedig. Gall hyn ategu ei gwrs gwreiddiol a dangos cynnydd yn ei gyfanrwydd. Er enghraifft, efallai y bydd yn dilyn Lefel 3 Harddwch gyda Thrin Gwallt Lefel 3.

Mewn amgylchiadau o'r fath, dylech ddefnyddio'ch disgresiwn ac ystyried pob achos ar ei ben ei hun i benderfynu a oes dilyniant.

Os bydd myfyriwr yn newid ei raglen astudio, efallai y bydd angen i ni ailasesu ei hawl neu ei gymhwysedd.

Mae’r newidiadau hyn yn cynnwys:

• newid cwrs
• newid oriau cyswllt
• newid y Ganolfan Ddysgu

Os bydd unrhyw ran o hyn yn digwydd, dylech ddechrau ailasesiad ar Borth y Ganolfan Ddysgu. Rhaid i chi nodi'r wybodaeth newydd cyn gynted â phosibl. Gall unrhyw oedi achosi gordaliad i'r myfyriwr.

Os yw myfyriwr yn trosglwyddo i gwrs cymwys arall yn ystod y flwyddyn academaidd, rhaid i’r trosglwyddiad gynnwys dilyniant academaidd. Rhaid i'r cwrs newydd fod o'r un lefel neu lefel uwch. Fel arall, ni ellir ystyried y myfyriwr ar gyfer GDLlC AB am weddill y flwyddyn academaidd.

 Mae eithriad i’r rheol hon os yw pob un o’r canlynol yn berthnasol:

• mae'r cwrs newydd ar lefel is na'r un gwreiddiol
• mae’r myfyriwr yn trosglwyddo o fewn yr 20 wythnos gyntaf o ddechrau’r cwrs gwreiddiol
• nid yw’r myfyriwr wedi cael cymorth GDLlC AB ar gyfer cwrs ar y lefel is honno o’r blaen

Os na chaiff yr amodau hyn eu bodloni, ni fydd y myfyriwr yn gymwys ar gyfer GDLlC AB nes y gall ddangos dilyniant o flwyddyn gyntaf ei gwrs gwreiddiol.

Enghreifftiau

Myfyriwr A yn astudio Lefel 2 Trin Gwallt hyd at wythnos 24, yna'n trosglwyddo i Lefel 2 Harddwch. Mae Myfyriwr A yn parhau i fod yn gymwys ar gyfer GDLlC AB.

Mae Myfyriwr B yn astudio Harddwch Lefel 3 ac yna'n trosglwyddo i Lefel 2 Trin Gwallt yn wythnos 12 y cwrs. Nid yw Myfyriwr B wedi derbyn GDLlC AB ar gyfer astudiaeth lefel 2 o'r blaen. Mae Myfyriwr B yn parhau i fod yn gymwys ar gyfer GDLlC AB.

Mae Myfyriwr C yn astudio Harddwch Lefel 3 ac yna'n trosglwyddo i Lefel 2 Trin Gwallt yn wythnos 12 y cwrs. Mae Myfyriwr C wedi derbyn GDLlC AB ar gyfer astudiaeth lefel 2 o'r blaen. Nid yw Myfyriwr C bellach yn gymwys ar gyfer GDLlC AB am weddill y flwyddyn academaidd.

Mae Myfyriwr D yn astudio Harddwch Lefel 3 ac yna'n trosglwyddo i Lefel 2 Trin Gwallt yn wythnos 26 y cwrs. Nid yw Myfyriwr D yn gymwys ar gyfer GDLlC AB am weddill y flwyddyn academaidd nes y gall ddangos ei fod yn symud ymlaen.

Mae nifer o newidiadau mewn amgylchiadau personol a allai ysgogi ailasesiad o gymhwysedd neu hawl y myfyriwr.

Dylai myfyrwyr gysylltu â Chyllid Myfyrwyr Cymru i wirio a oes angen iddynt gwblhau ffurflen ailasesu.

Mewn achosion eithriadol, efallai na fydd myfyriwr cymwys yn gallu bodloni meini prawf presenoldeb y cynllun GDLlC AB oherwydd natur ei anabledd. Os yw'n ymddangos bod myfyriwr yn bodloni'r meini prawf achos eithriadol, dylech gysylltu â'n Desg Gymorth Partneriaid. Rhaid i'r myfyriwr fodloni gweddill y meini prawf cymhwysedd o hyd, megis oedran, trothwy incwm a phreswyliad.

Bwriad GDLlC AB yw helpu gyda chostau mynychu ysgol neu goleg, nid costau byw. Oherwydd hyn, ni fydd derbyn GDLlC AB yn effeithio ar unrhyw daliadau Credyd Cynhwysol.

Nid yw GDLlC AB yn cyfrif tuag at yr asesiad o Gredyd Cynhwysol. Ni ddylid ei ddidynnu o unrhyw swm Credyd Cynhwysol y gall y myfyrwyr ei dderbyn. Rydym hefyd wedi gwneud newid i'r Llythyr Dyfarniad myfyriwr i ddweud hyn.

Os oes gennych chi neu’ch myfyrwyr unrhyw gwestiynau pellach am asesiadau Credyd Cynhwysol, cysylltwch â’r Adran Gwaith a Phensiynau neu Lywodraeth Cymru.

Os yw myfyrwyr yn meddwl bod GDLlC AB wedi’i gynnwys yn yr asesiad Credyd Cynhwysol, cynghorwch nhw i ddilyn proses yr Adran Gwaith a Phensiynau ar gyfer ailystyriaeth orfodol.

Os oes gennych unrhyw fyfyrwyr sy'n cwblhau dedfrydau o garchar, cysylltwch â'n Desg Gymorth Partneriaid ynghylch eu cymhwysedd. Mae hyn yn cynnwys unrhyw fyfyrwyr sy'n cyflawni dedfrydau o garchar sy'n mynychu cyrsiau ar ryddhad diwrnod.

Rydym yn cynnal gwiriad sampl o fyfyrwyr adnewyddu awtomatig yn ystod mis Tachwedd pob blwyddyn academaidd. Byddwn yn cyhoeddi dyddiadau gwirio sampl ar Borth y Ganolfan Ddysgu er gwybodaeth i chi.

Byddwn yn cysylltu â’r myfyrwyr ac yn gofyn iddynt ddarparu manylion ariannol neu dystiolaeth o incwm yn ddibynnol ar eu statws dibyniaeth. Os na fyddant yn ymateb neu’n methu’r gwiriad sampl, byddwn yn atal taliadau yn y dyfodol a byddwn yn ceisio adennill unrhyw daliadau rydym wedi’u gwneud eisoes.

Bydd Cytundebau Dysgu GDLlC AB yn cael eu hatal dros dro ar gyfer unrhyw fyfyrwyr y bydd hyn yn effeithio arnynt. Bydd hwn yn dangos ar Borth y Ganolfan Ddysgu fel 'SLC suspend' ('atal SLC').

Unwaith y bydd myfyriwr wedi llenwi ffurflen gais GDLlC AB a’i dychwelyd ynghyd â’i dystiolaeth wreiddiol, byddwn yn asesu ei gais. Byddwn yn cysylltu â’r myfyriwr os oes unrhyw wybodaeth neu dystiolaeth ar goll.

Mae dau gam i benderfynu a yw myfyriwr yn gymwys i gael GDLlC AB a pha swm y mae ganddo hawl iddo.

Mae cymhwysedd personol yn seiliedig ar y wybodaeth bersonol ac ariannol y mae'r myfyriwr wedi'i rhoi ar y ffurflen gais. Mae hyn yn pennu a yw'r myfyriwr yn gymwys i gael cymorth GDLlC AB. Mae hefyd yn pennu ei fand hawl. Os yw’r myfyriwr yn gymwys, byddwn yn anfon Llythyr Dyfarniad Dros Dro ato i gadarnhau hyn.

Mae cymhwyster cwrs yn rhywbeth y bydd angen i chi ei gadarnhau. Mae angen y wybodaeth hon arnom cyn y gallwn anfon Llythyr Dyfarniad Terfynol i'r myfyriwr. Mae'n cynnwys manylion y cwrs, dilyniant a nifer yr oriau cyswllt. Bydd hyn yn penderfynu yn y pen draw a oes gan y myfyriwr hawl i swm rhan-amser neu amser llawn o gymorth.

Cyn blwyddyn academaidd 2019/20, casglodd ein proses asesu incwm myfyrwyr amser llawn annibynnol. Os oedd gan y myfyrwyr hyn bartner, tybiwyd bod incwm y partner yn uwch a diystyrwyd incwm y myfyriwr. Mae rheolau'r cynllun yn ei gwneud yn ofynnol i bob myfyriwr roi manylion eu hincwm, y dylid wedyn ei fesur yn erbyn unrhyw incwm arall o'r un cartref.

Ers blwyddyn academaidd 2019/20, mae ein proses asesu wedi newid fel bod incwm pob myfyriwr annibynnol yn cael ei ystyried.

Cyn blwyddyn academaidd 2020/21, ni wnaethom ofyn am unrhyw wybodaeth incwm ar gyfer myfyrwyr dibynnol cymwys. Yn lle hynny, defnyddiwyd incwm eu rhieni ac unrhyw bartneriaid i'r rhieni i bennu incwm y cartref. Nawr, mae angen i fyfyrwyr dibynnol roi gwybodaeth am unrhyw incwm trethadwy yn y flwyddyn dreth flaenorol (blwyddyn dreth -2).

Byddwn yn cymharu incwm myfyriwr dibynnol ag incwm eu rhieni neu warcheidwaid i benderfynu pa un sydd uchaf. Byddwn yn cyfrif yr incwm uwch fel incwm y cartref ac yn defnyddio hwn i bennu hawl y myfyriwr.

Ar gyfer myfyrwyr sy'n dychwelyd, mae llofnodi eu Cytundeb Dysgu GDLlC AB yn gweithredu fel cais ffurfiol am gymorth GDLlC AB o dan delerau ac amodau'r flwyddyn academaidd honno. Mae hyn yn disodli'r angen iddynt gwblhau a dychwelyd ffurflen gais newydd.

Mae ceisiadau myfyrwyr cymwys sy'n dychwelyd yn cael eu trosglwyddo'n awtomatig i'r flwyddyn academaidd nesaf. Fodd bynnag, mae'n rhaid i chi gadarnhau eich bod chi a'r myfyriwr wedi llofnodi Cytundeb Dysgu GDLlC AB. Bydd hyn yn rhoi gwybod i ni fod y cais yn parhau i fod yn ddilys.

Dylai cynnwys Cytundeb Dysgu GDLlC AB fod yr un fath ar gyfer myfyriwr sy'n dychwelyd ag ar gyfer myfyriwr newydd.

Rhaid i fyfyrwyr newydd wneud cais am GDLlC AB o fewn 9 mis i ddechrau eu cwrs.

Rhaid i fyfyrwyr sy'n dychwelyd ddeall eu bod, trwy lofnodi eu Cytundeb Dysgu GDLlC AB, yn gwneud cais ffurfiol am gymorth GDLlC AB ar gyfer y flwyddyn academaidd honno. Mae llofnodi'r cytundeb yn disodli'r angen i gwblhau a dychwelyd ffurflen gais. Rhaid iddynt felly lofnodi eu cytundeb o fewn 9 mis o ddechrau eu cwrs.

Mae Cytundebau Dysgu GDLlC AB yn ffordd glir a chryno o nodi beth sydd angen i fyfyrwyr ei wneud i dderbyn eu taliadau tymhorol. Maent yn cwmpasu telerau presenoldeb y myfyrwyr.

Rhaid i fyfyrwyr newydd a myfyrwyr sy'n dychwelyd lofnodi Cytundeb Dysgu GDLlC AB. Ar gyfer myfyrwyr sy'n dychwelyd, eu llofnod Cytundeb Dysgu GDLlC AB yw eu cais ffurfiol i'r cynllun GDLlC AB. Am y rheswm hwn, rhaid i chi ddefnyddio'r templed Cytundeb Dysgu GDLlC AB gorfodol, a gyhoeddwyd gan Gyllid Myfyrwyr Cymru, ar gyfer myfyrwyr newydd a myfyrwyr GDLlC AB sy'n dychwelyd. Gallwch ddod o hyd i hwn ar Borth y Ganolfan Ddysgu.

Gellir llofnodi cytundebau dysgu yn bersonol ar ffurflen bapur. Gallwch hefyd e-bostio'r cytundebau i'ch myfyrwyr os yw cyfarfod yn bersonol yn anodd. Dylech ofyn am e-bost gan y myfyriwr fel cadarnhad ei fod yn cytuno i'w delerau GDLlC AB. Storiwch yr e-byst hyn mewn ffeil electronig at ddibenion archwilio.

Mae'n rhaid i chi a'r myfyriwr lofnodi a chadw copi o Gytundeb Dysgu GDLlC AB. Rhaid i chi gadw copïau o holl gofnodion GDLlC AB am 7 mlynedd at ddibenion archwilio.

Mae templed Cytundeb Dysgu GDLlC AB yn cynnwys cwestiwn i nodi dewis iaith y myfyriwr (Cymraeg neu Saesneg). Dylech ddethol y dewis iaith cywir ar Borth y Ganolfan Ddysgu pan fyddwch yn cadarnhau bod y myfyriwr wedi llofnodi'r cytundeb.

Gallwch ddefnyddio Ffurflen Person Enwebedig Cytundeb Dysgu GDLlC AB os nad yw myfyriwr yn gallu llofnodi Cytundeb Dysgu GDLlC AB. Mae'r ffurflen hon yn gadael i drydydd parti enwebedig ei harwyddo ar eu rhan.

Gallai’r trydydd parti enwebedig fod yn rhiant, gwarcheidwad neu ofalwr sy’n gyfrifol am faterion gweinyddol neu ariannol y myfyriwr.

Mae Ffurflen Cytundeb GDLlC AB Person Enwebedig ar gael ar Borth y Ganolfan Ddysgu.

Mae angen i chi goladu eich data presenoldeb bob tymor, gan y byddwch yn ei ddefnyddio i awdurdodi taliadau GDLlC AB. Dyma'r dystiolaeth sy'n gadael i chi benderfynu a yw'r myfyriwr yn bresennol ai peidio.

Dylech ddefnyddio'r prosesau sydd gan eich Canolfan Ddysgu eisoes ar gyfer casglu'r data presenoldeb. Os bydd ysgolion yn cau yn anfwriadol, rhaid i chi gadarnhau presenoldeb eich myfyrwyr o hyd.

Rhaid i chi gadw'r holl gofnodion o'ch penderfyniadau monitro presenoldeb a thalu mewn fformat sy'n addas i'w archwilio. Mae hyn yn cynnwys absenoldebau awdurdodedig ac anawdurdodedig. Rhaid i chi gadw'r cofnodion hyn am 7 mlynedd yn unol â gofynion archwilio safonol.

Unwaith y byddwch wedi gwneud penderfyniad am bresenoldeb myfyriwr, rhaid i chi ei gyflwyno ar Borth y Ganolfan Ddysgu.

Ni allwn ryddhau unrhyw daliadau nes eich bod wedi cadarnhau bod y myfyriwr yn bresennol yn y flwyddyn academaidd hon.

Yn nhymor 1, rhaid i chi gadarnhau presenoldeb ar ôl i'r myfyriwr fod yn bresennol am 2 wythnos. Rhaid i chi hefyd gadarnhau bod y myfyriwr yn parhau i fod wedi'i gofrestru ac yn parhau i fynychu bob tymor.

Mae'r rheol pythefnos yn berthnasol ar gyfer tymor 1 yn unig. Nid oes amserlen benodol ar gyfer y 2 dymor canlynol, ond rydym yn disgwyl i chi gadarnhau presenoldeb cyn gynted â phosibl. Mae hyn yn sicrhau bod eich myfyrwyr yn derbyn eu cyllid heb oedi.

Gallai’r enghreifftiau canlynol fod yn rhesymau derbyniol dros awdurdodi absenoldebau:

• ymweliad â diwrnod agored prifysgol neu gyfweliad yn ymwneud â gyrfa
  
  
• lleoliad gwaith, sy’n rhan annatod o gwrs y myfyriwr ac nad yw’r myfyriwr yn cael tâl amdano
  
  
• mynychu angladd, priodas neu seremoni sifil aelod agos o'r teulu 
  
  
• mynychu cyfarfod gwasanaeth prawf
  
  
• tarfu’n ddifrifol ar ddull teithio myfyriwr sy’n gadael y myfyriwr heb unrhyw ddull o deithio i’r ysgol neu’r coleg
  
  
• gwers yrru (ddim yn ystod dosbarthiadau a addysgir)
  
  
• prawf gyrru
  
  
• argyfwng teuluol, megis yr angen i ofalu am aelod o’r teulu – gall hyn fod yn bwysig i fyfyrwyr sydd â chyfrifoldebau gofalu, fel gofalwyr sy'n ifanc ac yn oedolion ifanc
  
  
• gweithgareddau allgyrsiol sy'n cynrychioli cyflawniad personol arwyddocaol, megis cymryd rhan mewn chwaraeon ar lefel genedlaethol neu sirol neu waith gwirfoddol
  
  
• apwyntiadau meddygol na ellid eu gwneud y tu allan i oriau ysgol neu goleg
  
  
• ar gyfer gofalwyr sy'n ifanc neu’n oedolion ifanc, mynychu apwyntiadau meddygol ar gyfer y sawl y maent yn gofalu amdano
  
  
• teithiau allgyrsiol a drefnir ac a awdurdodir gan y Ganolfan Ddysgu yn ystod y tymor, er enghraifft teithiau sgïo a diwrnodau allan
  
  
• oedi neu ganslo trafnidiaeth gyhoeddus
  
  
• mynychu apwyntiadau gweld llety neu dai pan nad yw hyn ar gael y tu allan i oriau ysgol
  
  
• llofnodi cytundebau a chontractau llety neu dai pan fo angen gwneud hynny yn ystod oriau ysgol

Enghraifft yw'r rhestr hon ac nid yw'n hollgynhwysfawr. Os oes gennych unrhyw amheuaeth, holwch ein Desg Gymorth Partneriaid.

Dylech asesu pob absenoldeb yn ôl ei rinweddau ei hun. Er enghraifft, efallai y byddwch yn ystyried y cwestiynau canlynol:

• Oedd yr absenoldeb yn rhesymol?
  
  
• A gafodd ei ategu gan dystiolaeth ddilys?
  
  
• A yw'r myfyriwr wedi cael llawer o absenoldebau cyn yr un hwn?
  
  
• A yw'r myfyriwr wedi defnyddio'r un rheswm o'r blaen?
  
  
• A yw’r myfyriwr wedi dweud wrthych ymlaen llaw, neu cyn gynted ag y bo’n ymarferol?

Mae’n bosibl y bydd gan rai myfyrwyr, er enghraifft gofalwyr ifanc ac oedolion ifanc neu fyfyrwyr ag anableddau, amgylchiadau arbennig a allai effeithio’n anochel ar eu presenoldeb. Dylech ystyried yr holl amgylchiadau pan fyddwch yn penderfynu a yw absenoldeb wedi'i awdurdodi neu heb ei awdurdodi.

Nid yw’r rhesymau canlynol yn dderbyniol ar eu pen eu hunain dros awdurdodi absenoldeb:

• gwyliau, gan fod disgwyl i fyfyrwyr gymryd y rhain y tu allan i amser tymor
  
  
• gwaith rhan-amser neu amser llawn nad yw'n rhan o'r rhaglen astudio
  
  
• gweithgareddau hamdden
  
  
• penblwyddi neu ddathliadau teuluol (heb gynnwys priodasau neu seremonïau sifil)
  
  
• gwarchod brodyr a chwiorydd (heb gynnwys argyfyngau teuluol)

Nid yw'r rhestr hon yn hollgynhwysfawr ac mae ar gyfer arweiniad yn unig.

Mae Cytundeb Dysgu GDLlC AB yn cynnwys cwestiwn am amgylchiadau esgusodol. Gall hyn ysgogi trafodaeth rhyngoch chi a’r myfyriwr ynghylch a allai eu hamgylchiadau effeithio ar ei bresenoldeb.

Pwrpas hyn yw cefnogi myfyrwyr bregus sydd mewn perygl o beidio â chymryd rhan mewn addysg. Gallai hyn gynnwys cyfrifoldebau gofalu neu anableddau, ond nid yw’n gyfyngedig i hyn.

Os yw’r myfyriwr wedi amlygu amgylchiadau esgusodol, gallwch nodi hyn ar eu Cytundeb Dysgu GDLlC AB a Phorth y Ganolfan Ddysgu.

Dylech gydnabod y materion hyn pan fyddwch yn cadarnhau . Cymerwch nhw i ystyriaeth pan fyddwch chi'n penderfynu a ddylai'r myfyriwr dderbyn ei daliad.

Gallwch gyfrif cyfnodau unigol o salwch fel absenoldeb awdurdodedig os ydych yn argyhoeddedig bod y salwch yn ddilys. Sicrhewch fod y myfyrwyr yn darparu tystiolaeth briodol. Mae gennych hawl i wrthod cais am awdurdodiad os ydych yn amau ​​nad oedd y rheswm yn ddilys.

Rydym yn argymell eich bod yn defnyddio gweithdrefnau presennol eich Canolfan Ddysgu ar gyfer absenoldebau salwch at ddibenion GDLlC AB. Mae hyn yn unol â'r rheol gyffredinol ar gyfer absenoldebau awdurdodedig. Er enghraifft, efallai y bydd myfyriwr yn hunanardystio absenoldeb am hyd at 5 diwrnod, ond yn ôl eich disgresiwn chi yw faint o ardystiadau 5 diwrnod yr ydych yn eu derbyn. Y tu hwnt i'r cyfnod hwn, rhaid i'r myfyriwr gyflwyno tystiolaeth megis tystysgrif feddygol.

Gall y GDLlC AB helpu gyda chostau mynychu ysgol neu goleg. Am y rheswm hwn, nid yw salwch hirdymor yn rheswm derbyniol dros awdurdodi absenoldebau.

Rhaid i chi adolygu unrhyw absenoldeb meddygol o 3 wythnos neu fwy a phenderfynu a ddylid ei gategoreiddio fel salwch tymor hir.

Dylech wneud eich meini prawf ar gyfer awdurdodi absenoldebau yn glir ac yn gyson. Mae'n helpu i sicrhau bod pob myfyriwr yn gwybod beth yw'r meini prawf a sut y cânt eu cymhwyso.

Dylech ddefnyddio eich polisi presenoldeb ac absenoldeb cyffredinol wrth ymdrin â GDLlC AB ar gyfer myfyrwyr nad ydynt yn bresennol am resymau’n ymwneud â beichiogrwydd, mamolaeth neu dadolaeth.

Os ydych yn ystyried bod absenoldeb beichiogrwydd, mamolaeth neu dadolaeth yn cael ei awdurdodi, yna bydd GDLlC AB yn daladwy. Dylech ddefnyddio eich disgresiwn ar gyfer absenoldeb cysylltiedig â mamolaeth ac asesu pob achos fel un unigryw yn dibynnu ar amgylchiadau unigol.

Dylech ddefnyddio'r un dull ar gyfer myfyrwyr nad ydynt yn bresennol am resymau'n ymwneud â thadolaeth.

Dylech gymhwyso'ch polisi absenoldeb ar gyfer mamolaeth a thadolaeth yn gyson i'ch holl fyfyrwyr, p'un a ydynt yn derbyn GDLlC AB ai peidio.

Dylech hefyd ystyried a yw'r myfyriwr wedi amlygu amgylchiadau esgusodol gwirioneddol.

Os nad yw myfyriwr wedi bodloni’r meini prawf presenoldeb, ni fydd yn cael taliad GDLlC AB. Rhaid ichi sicrhau eu bod yn deall y rhesymau dros hynny.

Os bydd myfyrwyr yn cysylltu â ni gydag unrhyw gwestiynau am eu presenoldeb, byddwn yn dweud wrthynt am ddod atoch yn lle hynny. Mae hyn oherwydd mai eich disgresiwn chi yw penderfynu a yw myfyrwyr yn bresennol ac i awdurdodi taliadau.

Telir am y cynllun GDLlC AB gan arian cyhoeddus. Felly, mae'n destun lefelau archwilio tebyg i gynlluniau addysg eraill sy'n ymwneud ag arian cyhoeddus.

Cadw cofnodion

Rhaid i chi gadw holl gofnodion ysgol a choleg yn ymwneud â data ariannol am o leiaf 7 mlynedd. Mae hyn yn cynnwys:

• data myfyrwyr
  
  
• Cytundebau Dysgu GDLlC AB
  
  
• absenoldebau awdurdodedig
  
  
• tystiolaeth presenoldeb
  
  
• gohebiaeth ynghylch GDLlC AB
  
  
• dogfennaeth ategol o gymhwysedd, megis cwrs a blwyddyn academaidd
  
  
• gwybodaeth rheoli

Mae hyn yn cynnwys cofnodion electronig a phapur.

Yn unol â Deddf Diogelu Data 2018, rhaid i chi gadw eich cofnodion mewn fformat ac amgylchedd diogel ac addas.

Mae gan fyfyrwyr yr hawl i apelio am:

• hawl i GDLlC AB
• eu taliadau presenoldeb

Os oes gan fyfyrwyr unrhyw gwestiynau am swm eu hawl i GDLlC AB, dylent gysylltu â Chyllid Myfyrwyr Cymru.

Os oes gan fyfyrwyr unrhyw gwestiynau am bolisi neu reolau cynllun GDLlC AB, dylent anfon e-bost at Lywodraeth Cymru yn isadrancyllidmyfyrwyr@llyw.cymru.

Eich Canolfan Ddysgu sydd i benderfynu a oes gan fyfyriwr hawl i daliadau GDLlC AB ai peidio. Dylai apeliadau am y penderfyniadau hyn ddod atoch chi yn gyntaf felly. Disgwyliwn i chi gael eich proses apelio sefydledig eich hun a gyhoeddir ac sydd ar gael i'ch myfyrwyr.

Mae’n bosibl y bydd gan rai myfyrwyr, er enghraifft gofalwyr ifanc ac oedolion ifanc neu fyfyrwyr ag anableddau, amgylchiadau arbennig. Gallai hyn effeithio’n anochel ar eu presenoldeb. Dylech ystyried yr holl amgylchiadau pan fyddwch yn penderfynu a yw absenoldeb wedi'i awdurdodi neu heb ei awdurdodi.

Fel rhan o’n gwaith i gydymffurfio â Deddf Diogelu Data 2018, byddwn yn dileu rhywfaint o wybodaeth o’n systemau nad oes gennym reswm i’w chadw mwyach.

Mae hyn yn cynnwys dileu ceisiadau a gwybodaeth cwsmeriaid lle:

• ni wnaed taliad erioed
• mae sbardunau cadw a chyfnodau y cytunwyd arnynt wedi mynd heibio

Mae rhai eithriadau lle byddwn yn cadw’r data am gyfnod hwy, megis achosion o dwyll.

Y sbardunau cadw arferol yw:

• Ceisiadau GDLlC AB sydd heb eu cymeradwyo – diwedd y flwyddyn academaidd gyfredol (31 Awst)
  
  
• Ceisiadau GDLlC AB sydd wedi’u cymeradwyo – diwedd y flwyddyn academaidd ganlynol (31 Awst) os nad oes taliad wedi’i wneud

Y cyfnod cadw ar ôl y sbardun yw 6 mis ar gyfer pob cais.

Eich cyfrifoldebau pwysicaf yw cadarnhau manylion cwrs a phresenoldeb y myfyriwr. Bydd hyn yn gadael i ni ryddhau taliadau GDLlC AB i'r myfyrwyr.

Mae eich cyfrifoldebau hefyd yn cynnwys:

• dosbarthu ffurflenni cais i'ch myfyrwyr pan fo angen
  
  
• bod yn bwynt cyswllt i fyfyrwyr ar ôl iddynt dderbyn eu Llythyrau Dyfarnu Dros Dro
  
  
• cynnig cymorth a chyngor ar ddilyniant, cyrsiau a rhaglenni astudio
  
  
• rhoi cyngor am y rheolau presenoldeb yn eich ysgol neu goleg
  
  
• cynhyrchu a chadarnhau Ffurflenni Cytundeb Dysgu GDLlC AB ar gyfer pob myfyriwr cymwys
  
  
• mewnbynnu gwybodaeth myfyrwyr ar y Porth Canolfannau Dysgu, gan gynnwys cadarnhad eu bod yn mynychu cwrs cymwys
  
  
• delio ag unrhyw apeliadau am fanylion cwrs a chadarnhau presenoldeb
  
  
• cadw llwybrau archwilio tystiolaeth a dogfennau ategol am 7 mlynedd
  
  
• dweud wrthym ar unwaith os byddwch yn dod yn ymwybodol y gallai myfyriwr fod yn cyflawni twyll wrth wneud cais am GDLlC AB – gall eich gweinyddwyr GDLlC AB ddod o hyd i ganllawiau ynghylch twyll ar Borth y Ganolfan Ddysgu